Kuulumizii Salmi-Fondaspäi

Salmi-Fondan halličuksen vuozikerähmö piettih Kuopijos 21. tuhukuudu 2014. Kerähmös käziteltih siändömiärällizet vuozikerähmöh kuulujat dielot, ezim. mennyön vuvven ruadokerdomus, tulot-menot, da vuvven 2014 ruadopluanu. Lizäkse piettih paginua erähis mieldykiinnittäjis kyzymyksis da luajittih tärgielöi piätöksii.

Salmi-Fondan ruavon piäkyzymyksenny on Salmin voulostin histourien kirjutus, kudamal on suuri vaikutus fondan talovuoh tämän dai vie tuliengi vuvven algupuolel. Hyviä mieldy andau se, ku tiijämmö, kirjuprojektu on maltajis käzis. Kirjuttajis tuldih kerähmöh vastuolline piätoimittai FD, dotsentu Jukka Kokkonen da professor Tapio Hämynen Itä-Suomen yliopistospäi. Hyö sellitettih, kui on mennyh edehpäi ruadojoukon projektu. Kirjuttajua on piätoimittajan lizäkse kuuzi spetsialistua, da jogahizel heis on selgei ruado: omassah tutkimusalovehen pohjal kerätä da tutkie Salmih kuului materjualu, da kirjuttua omassah luvut. Kirjutukset pidäy olla valmehennu tämän vuvven loppupuolel. Salmin histouriedu kirjutuksis käzitelläh monipuolizesti, algajen vuvves 1617 vuodeh 1948, konzu Salmin voulosti virallizesti loppihes. Kirjah on jo kerätty hyviä kuvamaterjualua eri arhiivois da salmilazien omis al’bomois.

Tarkan talovuonpivon täh oli fondan halličuksel mahtollizus jagua täsgi kerähmös denguabuu erähih kiriköllizih pruazniekkoih da projektoih. Eriže on vie sygyzyl jogavuodehine opastunduabudengoin jago. Vuoros ollah net ammattiškolis opastujat nuoret, kel ollah salmilazet juuret. Tarkembua tieduo löydyy elokuus Karjala-lehtes da Salmi-Fondan omil nettisivuloil (www.salmi-saatio.fi).

Karjalan Liiton Karjalazien kezäpruazniekkoin aigah Lappeenrannas järjestetäh moine Salmilazien illačču, mittuine oli kaksi vuottu tagaperin Lahtes. Se pietäh suovattuehtäl 14.6. Majurska-kahvilas. Tarkembua tieduo jiävindäh näh tulou keviän lopul Salmi-Fondan sivuloile da Salmi-kerholoin kauti.

Salmi-Fondan paginanvedäjäkse vuvvekse 2014 vallittih Raija Pyöli da varapaginanvedäjäkse Vilho Paussoi.

Sanastoa:
Salmi-Fondu Salmi-Säätiö, vuozikerähmö vuosikokous, ruadopluanu toimintasuunnitelma, voulosti pitäjä, sellittiä tehdä selkoa, tutkimusaloveh tutkimusala, pruazniekku juhla, eriže erikseen, opastunduabudengat opiskeluapurahat, suovattuehtäl lauantai-iltana, jiävindy ilmoittautuminen